Hit (1537) MM-90

Naat - Ey Kişver i Risalete Sultanı Enbiya

Eser Sahibi : T. E. Medya Türü : Naat
İlim Dalı : Şiir Konusu : Peygamberimiz
Link :
Ekleyen : /2007-04-14 Güncelleyen : /2009-04-14

NAT-I ŞERİF

Ey kişver-i risâlete sultân-ı enbiyâ
Rûh-i revân-ı cism-i rüsül cân-ı enbiyâ
Mihr-i celi fürûğu sipihr-i risâletin
Bürc-i nübüvvete meh-i tâbân-ı enbiyâ
Ümmet-sipâh-ı pâdişeh-i asfiyâ sufûf
Sâhibkırân-ı merkez-i meydân-ı enbiyâ
Mahbûb-i nâz-perver-i kâşâne-i yakîn
Sultân-ı nâzenin şeh-i hûbân-ı enbiyâ
Etmiş midâd sun’-i salât ü selâmeti
Arâyiş-i kitâbe-i eyvân-ı enbiyâ
Hellâl-i her süâl ki nutk-i fasihidir
Müşkil-küşâ-yı mekteb-i irfân-ı enbiyâ
Bâğ-ı ruhunde olmuş o giysû-yi ham-be-ham
Müşkin şemîm-i sünbül ü reyhân-ı enbiyâ
Berk-i hayâl-i nûr-i serâ-perde-i yakîn
Müşkât-ı hüsnü şem’-i şebistân-ı enbiyâ
Kühl-i uyûn-i cân-ı rüsül hâk-i makdemi
Gerd-i harîmi sürme-i a’yân-ı enbiyâ
Olmuş vücûdu hil’at-i Levlâk ile ezel
Sultân-ı çâr-bâliş-i dîvân-ı enbiyâ
Nâm-ı şerifi ser-sühan-i fihris-i rüsül
Ser-levha-i cerîde-i unvân-ı enbiyâ
Dârüşşifâ-yı aşk alîl-i dil-i rüsül
Derd-i gam-ı muhabbeti dermân-ı enbiyâ
Olsa aceb mi Bâğ-ı İrem gibi bî-hazân
Güldeste-i gamıyla girîbân-ı enbiyâ
Dergâh-ı izzetinde nola olsa dem be dem
Hep hidmetiyle ber-zede dâmân-ı enbiyâ
Ayn-i inâyeti nazar-endaz-ı imtinân
Çeşm-i himayetiyle nigehbân-ı enbiyâ
Lâyık değilse de umarım fazl-ı Hak ede
Bu nazm-ı âcizânemi şâyân-ı enbiyâ
Yâ Rab be-hakk-ı Fahr-i Rüsül tâ ki zindedir
Cân-ı Nazîm’i eyle senâ-hân-ı enbiyâ

Nazim